नेपाल ‘रेड लिष्ट’मा भएकोले युकेका नेपालीलाई सकस

बेलायत सरकारले अन्य देशबाट बेलायत भित्रंदा कोभिडको हानिकारक भेरियन्ट फैलन नपाओस् भनेर रेड, एम्बर र ग्रीन गरि तीन लिष्ट निर्धारण गरेको छ । ‘रेड लिष्ट’ मा रहेका देशबाट आउने यात्रुले १० दिन (११ रात) होटल क्वारेन्टिन बस्दा एक कोठाको प्रति व्यक्ति २२८५ पाउण्ड, ११ वर्ष माथिकाले अतिरिक्त प्रति व्यक्ति १,४३० पाउण्ड र ५ देखि ११ वर्षका बालबालिकाले अतिरिक्त ३२५ पाउण्ड तिर्नुपर्नेछ । पांच वर्ष मुनिकालाई निशुल्क छ । होटल क्वारेन्टिन नियम उल्लंघन गरे १० हजार पाउण्डसम्म जरिवाना र जेल सजाय छ । यात्रा गर्नु तीन दिनअघि, बेलायत आइसकेपछि दोश्रो र आठौं दिनमा पिसिआर परीक्षण गरि नेगेटिभ रिजल्ट पेश गर्नुपर्नेछ ।

अहिले घुम्ने प्रयोजन (भिजिट भिजा) मा बेलायत आउन प्रतिवन्ध भएपनि ब्रिटिश राहदानीवाहक, बेलायतको आवासीय भिजा भएका बेलायत आउन पाउंछन् । एम्बर लिष्टमा रहेको देशबाट बेलायत भित्रिएका यात्रुले होटल नगइ आफ्नै घरमा १० दिन आइसोलेसन बसे हुन्छ ।

जो बेलायत आउनै पर्ने अवस्थामा छन् वा यहींका बासिन्दा पनि आकष्मिक यात्रा गर्नु पर्दा अहिले ज्यादै सकस भोगिरहेका छन् । विशेष गरि नेपालबाट बेलायत भित्रने यात्रुहरु बेलायतको कोभिड नियमका कारण प्रताडित बनेका छन् । सबै भन्दा धेरै मर्का नेपालवाट आएका जेष्ठ नागरिक हरुलाई पर्न गएको छ । किनकी जेष्ठ नागरिकहरुलाई बेलायतमा बस्ने अनुमति त दिइयो तर सबै परिवारलाई बेलायतमा ल्याउन भने दिएका छैनन् । यस नियमले पारिवारिक विखन्डन भएको छ । परिवारबाट टाढा बस्दा दशैँ तिहारको मौका पारेर जेष्ठ नागरिक हरु नेपाल जाने गर्छन । तर यसपाली रेड लिस्टले गर्दा सुनसान छ । नेपाल गए पनि फर्केर आउदा होटेल एक कोठाको प्रति व्यक्ति २२८५ पाउण्ड तिरेर होटेलमा बस्नु पेन्सनको पैसाले पुग्दैन । यस्तो महामारीमा उमेर ढल्केका बुढापाकाहरुलाई पक्कै पनि सजिलो छँदैछैन ।