समाजसेवी मुक्तबहादुर दिसुवामगरद्वारा बुद्धको प्रतिमा स्थापित

बम थापा (सूर्यवंशी)

पाल्पा, मङ्सिर २६ । गाउँघरमा नै बसेर रमाउने भूतपूर्व गोर्खा समाजसेवी मुक्तबहादुर दिसुवामगरद्वारा निर्मित बुद्ध मन्दिरको उदघाटन कार्यक्रमका प्रमुख अतिथि नेपाल सरकारद्वारा प्रदान गरिने गोरखा दक्षिणबाहु तेस्रोले विभूषित तथा पाल्पाली नागरिकहरुद्वारा दुईपटक सम्मानित समाजसेवी जापानिज नागरिक काजुमासा काकिमी (ओके बाजे) थिए । उनै काजुमासा काकिमीद्वारा उदघाटन समारोहमा बुद्धको मूर्ति स्थापना गरिएको थियो भने सो अवसरमा विभिन्न विशिष्ट अतिथि, गाउँका समाजसेवी र भद्रभलादमीहरुको बाक्लो उपस्थिति रहेको थियो । आफ्नै निजी खर्चमा तल्लो मलेङमा अवस्थित सानो पानीपोखरीको बीचमा उहाँका बाबा स्व. श्रीधर दिसुवामगर, आमा स्व. बसुन्धरा दिसुवामगर र श्रीमती अतिसरा दिसुवामगरको स्मृतिमा सो बुद्धको मन्दिर स्थापनासहित उद्घाटन गरिएको हो ।

समाजसेवी मुक्तबहादुर दिसुवामगर भूतपूर्व ब्रिटिश गोर्खा सैनिक हुन् । बेलायत सरकारको चार वर्ष वा सोभन्दा बढी नोकरी गरेका भूतपूर्व गोर्खालाई बेलायतमा आवासीय अधिकार प्राप्त भयो । यो निर्णयअनुसार अधिकांश भूतपूर्व गोर्खाहरु र उनका परिवारहरु बेलायतमा बसाईं सरिसकेका छन् । दिसुवामगरका छोरीजवाइँ पनि परिवारसहित बेलायतमा नै छन् । मुक्तबहादुर दिसुवामगर बेलायतको सुखसुविधा छाडेर नेपालको पाल्पा जिल्ला, रम्भा गाउँपालिका– ५, ताहुँको तल्लो मलेङमा रहँदै समाजसेवामा नै रमाइरहेका छन् । सामाजिक सेवाका लागि एक प्रेरित व्यक्तित्व मुक्तबहादुर दिसुवाले त्यहीँ बसेर समाजसेवा गर्दै आएका छन् ।

ताहुँमा निकै ठूलो मलेङ गाउँ छ । माथिल्लो मलेङमा क्षेत्री जातिको बस्ती छ भने तल्लो मलेङमा क्षेत्रीसहित मगरको बाक्लो बस्ती रहेको छ । ठूलो गाउँ भएकाले खानेपानीको ठूलो समस्या थियो । समाजसेवी मुक्तबहादुर दिसुवामगरको पहलमा अहिले गाउँमा खानेपानीसहित हरियो सागसब्जीमा समेत राख्न पुग्ने गरी पानीको सुविधा मिलाइएको छ ।

त्यस्तै तल्लो मलेङ र माथिल्लो मलेङको बीचमा कृष्ण मन्दिरको स्थापना गरिएको छ । मन्दिर निर्माणमा पनि उहाँको ठूलो योगदान रहेको छ भने मन्दिरको द्वार बेलायतमा बस्ने उहाँकी कान्छी छोरीज्वाइँको पहलमा निर्माण गरिएको हो । भनिन्छ, नेपालमा निर्माण गरिएका कृष्ण मन्दिरका द्वारमध्ये यो एक आकर्षक द्वार मानिन्छ । यसरी समाजसेवी मुक्तबहादुर दिसुवामगरले सामाजिक विकासका लागि महत्वपूर्ण योगदान पुर्याउँदै आएका छन् ।