हजारौ दर्शक सहभागितामा बेलायतमा १७ औं नेपाली ओपन कन्सर्ट सम्पन्न

लण्डन । बेलायतमा हुने एक मात्र ओपन कन्सर्ट (खुल्ला सास्कृतिक कार्यक्रम) मगर संघ यूकेको आयोजनामा बेलायतमा हजारौ दर्शक सहभागितामा १७ औं नेपाली ओपन कन्सर्ट सम्पन्न भएको छ । फानबोरोस्थित रग्बी फुटबल क्लबमा शनिबार जून १४ तारिख २०२५ मा ख्यातिप्राप्त कलाकारहरुको प्रस्तुति, विभिन्न क्षेत्रमा परिचित व्यक्तिहरुको उपस्थिति र दर्शकको उल्लेख सहभागितामा ओपन कन्सर्ट सम्पन्न भएको हो । सांगीतिक धमाका सुरु हुनुअघि मगर संघ यूकेका अध्यक्ष लालबहादुर पुन (लालु)को अध्यक्षतामा औपचारिक कार्यक्रम भएको थियो । कार्यक्रम प्रमुख अतिथि नेपाली राजदूतावास लन्डनका प्रथम सचिव उद्धव न्यौपाने, अध्यक्ष लालु र कार्यक्रम प्रमुख संयोजक रुद्र थापामगरले रिवन काटेर उद्घाटन गरेका थिए ।

कार्यक्रमलाई पृथक् बनाउन ‘भाषण र आसन’लाई कटौती गर्दै कार्यक्रम सञ्चालक मगर संघ यूकेका महासचिव गोमन पुनले अध्यक्ष लालु र प्रमुख अतिथि नेपाली राजदूत चन्द्रप्रसाद घिमिरेका प्रतिनिधि प्रथम सचिव न्यौपानेलाई मात्रै मञ्चमा आशनग्रहण गराएका थिए । अन्य आमन्त्रित पाहुनालाई सामूहिक रुपमा यथास्थानमा आशनग्रहण गर्न भनिएको थियो । कार्यक्रम प्रमुख संयोजक थापामगरले स्वागत मन्तव्य राखेका थिए भने प्रमुख अतिथि न्यौपानेले संक्षिप्त शुभकामना मन्तव्य र अध्यक्ष लालुले समापन मन्तव्य राखेका थिए । कार्यक्रमलाई सम्बोधनका क्रममा प्रथम सचिव न्यौपानेले मगर संघ यूकेले हरेक वर्ष नेपाली कलाकारलाई विदेशी भूमिमा मञ्च दिएको र नेपाली संगीतलाई विश्वमा फैलाउने काम गरेको भन्दै प्रशंसा गरे । उलने बेलायतमा बसोबास गर्ने नेपाली समुदायको व्यस्त जीवनशैलीलाई एक दिन भने पनि मनोरन्जनमा सामेल गराउने काम मगर संघले गरेको उल्लेख गरे । ‘नेपाली कलाकारलाई मञ्च दिएको छ र नेपाली संगीतलाई विश्वमा फैलाउने काम गरेको छ । बेलायतको व्यवस्ताका बाबजुद नागरिकलाई मनोरन्जन आवश्यक छ, त्यसलाई कन्सर्टले पूरा गरेको छ,’ उनले अगाडि भने,’मगर संघ यूकेले गरेको यो कार्यक्रम कुनै जातीय होइन । सांगीतिक कार्यक्रम हो । समग्र नेपालीले संगीत सुन्ने, रमाउने, मनोरञ्जन गर्ने । यो देख्न र उपस्थित हुन पाउँदा मलाई खुसी लागेको छ । ओपन कन्सर्टजस्ता कार्यक्रम दूतावासले नै गर्नुपर्ने आवश्यकता महसुस भएको भन्दै उनले आयोजक र कलाकारलगायत सबैलाई राजूदत,राजदूतावास र आफ्नो तर्फबाट धन्यवाद दिए । आगामी दिनमा यस प्रकारका कार्यक्रमले निरन्तरता पाउन सकोस् भन्दै प्रथम सचिव न्यौपानले कन्सर्ट सबै सहभागी र सहयोगीले गौरवान्वित हुने खालको बनाउनुपर्नेमा जोड दिए ।

अध्यक्ष लालु पुनमगरले कार्यक्रम सफल बनाउने हर क्षेत्रमा सहयोग पुर्‍याउने सबैप्रति कृतज्ञता प्रकट गरे । उनले नेपाली कला, संस्कृति संरक्षण, संवर्द्धन र समुदायबीच एकता र सद्भाव कायम राख्ने उद्देश्यले ओपन कन्सर्ट आयोजना गर्दैआएको बताए । दोस्रो चरणमा सांस्कृतिक सचिव नुनु पाइजामगर मगरको नेतृत्वमा सांगीतिक कार्यक्रम भएको थियो । कार्यक्रम सञ्चालन भने सरुपा थापामगर र पवन रानामगरले आकर्षक ढंगले सञ्चालन गरेका थिए । कार्यक्रममा नेपालबाट आएका कलाकार खेम सेन्चुरी, अन्जु पन्त, प्रसाद खप्तरी मगर,विजय ठाडा मगरलगायतका कलाकारले आआफ्ना प्रस्तुति राखेका थिए । कार्यक्रममा बेलायतक विभिन्न वेल्स, क्याट्रिक, मिडल्यान्ड, अल्डरसट, रिडिङलगायतका स्थानबाट सहभागी भएका थिए ।

कार्यक्रममा ‘म्यूजिक फर युनिटी’ श्लोगन थियो । सन् २००२ मा स्थापना भएको मगर संघ यूकेले बेलायतमा नेपाली गीत, संगीत, कला, संस्कृतिको जगेर्ना र प्रवर्द्धन गर्ने उद्देश्यले सन् २००७ देखि हरेक वर्ष नेपाली ओपन कन्सर्ट आयोजना गर्दै आएको छ ।