नेफिन यूकेद्वारा बेलायतमा ३१औँ विश्व आदिवासी दिवस भव्य रूपमा मनाइने

लन्डन, जुलाई २७ –
नेपाल आदिवासी जनजाति महासंघ (नेफिन) यूकेले आगामी अगस्ट ९ र १० मा गिलफोर्डस्थित किरात राई हाउसको मैदानमा ३१औँ विश्व आदिवासी दिवस भव्य रूपमा मनाउने भएको छ। बेलायतमा रहेका नेपाली आदिवासी जनजातिहरूको एकता, पहिचान, संस्कृति र अधिकारको प्रवर्द्धनका लागि आयोजना गरिएको यस दुईदिने कार्यक्रमलाई विशेष उत्सवका रूपमा मनाउने तयारी गरिएको नेफिन यूकेले जनाएको छ।

विविध प्रतियोगिताले कार्यक्रमलाई बनाउनेछ विशेष
कार्यक्रमको पहिलो दिन, शनिबार (अगस्ट ९) युथ, भेट्रान (पुरुष) र महिला समुहबीच भलिबल प्रतियोगिता आयोजना गरिनेछ। दोस्रो दिन, आइतबार (अगस्ट १०) धनुषबाण प्रतियोगिता, झाँकी प्रदर्शनी, थेलो प्रतियोगिता, सांस्कृतिक कार्यक्रम तथा राफल ड्रसहितका विविध आकर्षक कार्यक्रमहरू समावेश गरिनेछ।

भलिबल प्रतियोगिताका पुरस्कार विवरण:
युथ (पुरुष):
पहिलो पुरस्कार – £1600
उपविजेता – £1000

भेट्रान (पुरुष):
पहिलो पुरस्कार – £1000
उपविजेता – £600

महिला समूह:
पहिलो पुरस्कार – £900
उपविजेता – £500

थप सुविधाहरू र विशेष आकर्षण
कार्यक्रमस्थलमा स्थानीय उत्पादनहरू, लत्ता–कपडा, घरायसी सामग्री र सूचनामूलक स्टलहरू राखिनेछन्। मनोरञ्जन सामग्रीसहित सहभागीहरूका लागि क्याम्पिङ सुविधा पनि प्रदान गरिनेछ।

राफल ड्रको विशेष आकर्षणस्वरूप एक तोला सुन पुरस्कारस्वरूप राखिएको छ, जसले सहभागीहरूमा उत्साह थप्ने अपेक्षा गरिएको छ।

सांस्कृतिक कार्यक्रम र अतिथिहरूको उपस्थिति
बेलायतभर क्रियाशील नेपाली संघसंस्थाहरूको सहभागिता रहने उक्त कार्यक्रममा नेपालबाट आमन्त्रित चर्चित कलाकारहरूले सांगीतिक प्रस्तुति दिनेछन्।

कार्यक्रमका प्रमुख अतिथिका रूपमा बेलायतका लागि नेपाली राजदूत श्री चन्द्रकुमार घिमिरेलाई आमन्त्रण गरिएको छ।

नेफिन यूकेको आह्वान
कार्यक्रमबारे जानकारी दिँदै नेफिन यूकेका अध्यक्ष मेजर योगेश राईले सम्पूर्ण बेलायतवासी नेपाली समुदायलाई कार्यक्रममा उपस्थित भई आदिवासीहरूको पहिचान, भाषा, संस्कृति र अधिकारको संरक्षणमा एकजुट हुन हार्दिक अनुरोध गरेका छन्।