नेफिन यूकेद्वारा विशेष अन्तरक्रिया कार्यक्रमको आयोजना, ओनसरी घर्ती र राम कार्की सहभागी हुने

लन्डन, २१ अगस्ट २०२५ — नेपाल आदिवासी जनजाति महासंघ (नेफिन) यूकेले आगामी ६ सेप्टेम्बर २०२५ मा एक विशेष अन्तरक्रिया कार्यक्रम आयोजना गर्ने भएको छ। नेफिन यूकेका अध्यक्ष मेजर योगेश राईले जानकारी दिएअनुसार कार्यक्रम नेपाली प्रवासी समुदायबीच नागरिकताको निरन्तरता र आदिवासी जनजातिका अन्तर्राष्ट्रिय अधिकारबारे गहिरो संवाद र जागरण ल्याउने उद्देश्यले आयोजना गरिँदैछ।

कार्यक्रम अल्डरसटस्थित द प्यालेस रेस्टुरेन्टमा बिहान ११ बजे सुरु हुनेछ। कार्यक्रममा पूर्वसभामुख ओनसरी घर्ती मगर र नेकपा माओवादी केन्द्रका सचिव एवं पूर्वमन्त्री राम कार्की विशेष अतिथिका रूपमा सहभागी हुनेछन्। उनीहरू दुबै आदिवासी जनजातिका आवाज बुलन्द गर्दै आएका अनुभवी नेताहरू हुन्।

नेफिन यूकेले जनाएको अनुसार अन्तरक्रिया कार्यक्रमको मूल विषयवस्तु हुनेछ:
नागरिकताको निरन्तरता, र संयुक्त राष्ट्रसंघीय आदिवासी जनजातिको अधिकारसम्बन्धी घोषणा–पत्र (UNDRIP)।
UNDRIP (United Nations Declaration on the Rights of Indigenous Peoples) एक ऐतिहासिक दस्तावेज हो जसले विश्वभरका आदिवासी जनजातिका हक, पहिचान, भाषा, संस्कृति, भूमि अधिकार र आत्मनिर्णयको अधिकार सुनिश्चित गर्न अन्तर्राष्ट्रिय मापदण्ड प्रस्तुत गर्छ। यद्यपि नेपालले यस घोषणापत्रलाई समर्थन गरिसकेको भए पनि यसको व्यवहारिक कार्यान्वयन अझै चुनौतीपूर्ण छ।

अध्यक्ष मेजर योगेश राईले भने, हामी प्रवासी भूमिमा बसेका नेपाली आदिवासी जनजातिहरूका लागि यस्ता कार्यक्रमहरूमार्फत सूचित नागरिक बनाउने प्रयासमा छौं। नागरिकता, पहिचान, र अन्तर्राष्ट्रिय अधिकारबारे गम्भीर छलफल आवश्यक छ। यो कार्यक्रम त्यसकै थालनी हो।” कार्यक्रममा युकेभरका नेपाली समुदाय, संघसंस्थाका प्रतिनिधि, मानवअधिकारकर्मी, विद्यार्थी, पत्रकार र अन्य सरोकारवालाहरूको सहभागिता रहनेछ।

कार्यक्रम विवरण:
मिति: ६ सेप्टेम्बर २०२५ (शनिबार)
समय: बिहान ११ बजे
स्थान: प्यालेस रेस्टुरेन्ट, अल्डरसट, यूके
आयोजक: नेपाल आदिवासी जनजाति महासंघ (नेफिन) यूके
अध्यक्ष: मेजर योगेश राई

सहभागी हुन इच्छुक महानुभावहरूलाई समयमै सम्पर्क गरी आफ्नो उपस्थितिको जानकारी गराउन आयोजकले आग्रह गरेका छन्।