गोर्खा कपको २४औँ संस्करण भव्य रूपमा आयोजना हुँदै, तमुधिं यूकेद्वारा तयारी सम्पन्न

लण्डन । बेलायतमा नेपाली समुदायबीच लोकप्रिय मानिने गोर्खा कप फुटबल प्रतियोगिताको २४औँ संस्करण आयोजना हुने भएको छ । प्रतियोगिता आयोजक तमुधिं यूकेले आइतबार मिचेटस्थित आफ्नै भवनमा पत्रकार सम्मेलन गर्दै प्रतियोगिताको सम्पूर्ण तयारी पूरा भएको जनाएको हो ।

यस वर्षको प्रतियोगितामा ३८ पुरुष टोली, १६ भेट्रान टोली तथा २ महिला टोली गरी कुल ५६ टोली सहभागी हुनेछन् । प्रतियोगिता संयोजक तथा स्पोर्ट्स सेक्रेटरी क्याप्टेन दीपक घलेका अनुसार खेलकुदमार्फत नेपाली समुदायबीच एकता, भाइचारा र सकारात्मक सन्देश प्रवाह गर्नु प्रतियोगिताको प्रमुख उद्देश्य रहेको छ ।

पुरुषतर्फ विजेता टोलीले ३ हजार ५०० पाउण्डसहित ट्रफी र प्रमाणपत्र प्राप्त गर्नेछ भने उपविजेताले २ हजार पाउण्ड पुरस्कार पाउनेछ । भेट्रानतर्फ विजेता र उपविजेताले समान १ हजार ८०० पाउण्ड प्राप्त गर्नेछन् । महिला विजेताले ६०० पाउण्ड तथा उपविजेताले ४०० पाउण्ड पुरस्कार पाउने आयोजकले जनाएको छ । साथै, प्रतियोगितामा ‘लेजेन्ड अफ द गोर्खा कप’ सम्मानसमेत प्रदान गरिनेछ ।

सन् १९९६ मा ७–ए–साइडबाट सुरु भएको प्रतियोगिता अहिले ९–ए–साइडमा विस्तार भइसकेको छ । आयोजकका अनुसार गोर्खा कप विदेशमा आयोजना हुने नेपाली समुदायको सबैभन्दा ठूलो खेलकुद कार्यक्रमका रूपमा परिचित हुँदै गएको छ ।

तमुधिं यूकेका वरिष्ठ उपाध्यक्ष परशु गुरुङले गोर्खा कप सम्पूर्ण नेपाली समुदायको साझा उत्सव भएको उल्लेख गर्दै कार्यक्रमलाई सफल बनाउन सबैको साथ र सहभागिता आवश्यक रहेको बताए ।

प्रतियोगिता बिहान ९ बजेदेखि राति ८ बजेसम्म सञ्चालन हुनेछ । प्रवेश शुल्क ५ पाउण्ड तोकिएको छ भने पार्किङ व्यवस्थासमेत गरिएको आयोजकले जनाएको छ । प्रतियोगितास्थलमा विभिन्न परिकारका खाना, च्यारिटी, लत्ताकपडा तथा अन्य व्यापारिक स्टलहरू रहनेछन् । बालबालिकाका लागि विशेष खेलकुद तथा मनोरञ्जनात्मक गतिविधिहरू पनि समावेश गरिने बताइएको छ ।

कार्यक्रमस्थलमा मदिरा सेवन, ड्रोन उडाउन तथा हतियार बोकेर प्रवेश गर्न पूर्ण रूपमा निषेध गरिएको आयोजकले स्पष्ट पारेको छ । यसपटक स्कटल्यान्डमा अण्डर–१५ फुटबल खेलिरहेकी नेपाली खेलाडी मेलिसा रेग्मी पनि प्रतियोगितामा सहभागी हुने जानकारी दिइएको छ ।

पत्रकार सम्मेलनमा तमुधिं यूकेका अध्यक्ष जुमकाजी गुरुङले कार्यक्रम सफल बनाउन सहयोग गर्ने प्रायोजक, सञ्चारमाध्यम, स्वयंसेवक तथा सम्पूर्ण सहयोगीप्रति आभार व्यक्त गरेका थिए । सो अवसरमा गोर्खा कपका लागि टिम ड्रसमेत सार्वजनिक गरिएको थियो ।