१/२ गोर्खा राइफल्स मोर्टर प्लाटुनको भव्य भेटघाट सम्पन्न

अल्डरशट, यूके – २० जुन २०२६

१/२ गोर्खा राइफल्स मोर्टर प्लाटुनका पूर्व सैनिक तथा परिवारजनहरूको भव्य भेटघाट कार्यक्रम शनिबार अल्डरशटस्थित डि–लाउन्ज रेस्टुरेन्ट एण्ड बारमा सम्पन्न भएको छ। कार्यक्रममा बेलायतका विभिन्न क्षेत्रबाट पूर्व सैनिक, परिवारजन तथा शुभेच्छुकहरूको उत्साहजनक सहभागिता रहेको थियो।

कार्यक्रमको सञ्चालन रामराज मल्ल र इन्द्र गुरुङ ले संयुक्त रूपमा गरेका थिए। सहभागीहरूले सैनिक सेवाकालका अविस्मरणीय अनुभवहरू साटासाट गर्दै आपसी सम्बन्धलाई अझ मजबुत बनाउने प्रतिबद्धता व्यक्त गरेका थिए।

कार्यक्रममा उपस्थित हुनेमध्ये सबैभन्दा वरिष्ठ सदस्य ०६१४ साइमन गुरुङ हुनुहुन्थ्यो। उहाँको उपस्थितिले कार्यक्रमलाई विशेष गरिमा प्रदान गरेको थियो। सहभागीहरूले उहाँप्रति सम्मान व्यक्त गर्दै गोर्खा सैनिकहरूको योगदान र गौरवपूर्ण इतिहासको स्मरण गरेका थिए।

“Together in Honour, Together in Pride – Once a Gurkha, Always a Gurkha” भन्ने मूल नाराका साथ आयोजित कार्यक्रममा पूर्व सैनिकहरूबीचको भाइचारा, एकता र सहकार्यको भावनालाई अझ सुदृढ बनाउने विषयमा विशेष छलफल गरिएको थियो।

कार्यक्रमको मिडिया पार्टनर London Kathmandu News रहेको थियो भने चर्चित गायिका जमुना राना को प्रस्तुति कार्यक्रमको प्रमुख आकर्षण बनेको थियो। उहाँका सांगीतिक प्रस्तुतिले सहभागीहरूलाई मनोरञ्जन प्रदान गर्नुका साथै कार्यक्रमलाई थप उत्साहपूर्ण बनाएको थियो।

कार्यक्रमको अन्त्यमा आयोजकहरूले सहभागी सबै पूर्व सैनिक, परिवारजन तथा सहयोगीहरूलाई धन्यवाद ज्ञापन गर्दै आगामी दिनहरूमा पनि यस्ता पुनर्मिलन तथा भेटघाट कार्यक्रमलाई निरन्तरता दिने प्रतिबद्धता व्यक्त गरेका थिए।

“एक पटक गोर्खा, सधैं गोर्खा” भन्ने भावनालाई आत्मसात गर्दै सम्पन्न भएको यस भेटघाट कार्यक्रमले १/२ गोर्खा राइफल्स मोर्टार प्लाटुनका सदस्यहरूबीचको आत्मीयता र एकतालाई थप मजबुत बनाएको विश्वास व्यक्त गरिएको छ।