पार्टीको सट्टा डर्डल डोरमा हेज सेरोफेरो समाज यूकेको वार्षिक भेटघाट

बम थापा सूर्यवंशी मगर

लन्डन। हेज सेरोफेरो समाज यूकेले हरेक वर्ष आयोजना गर्दै आएको वार्षिक भेटघाट यसपटक परम्परागत पार्टीभन्दा फरक ढंगले बेलायतको रमणीय पर्यटकीय स्थल डर्डल डोरमा सामूहिक भ्रमण तथा पिकनिक आयोजना गरी मनाएको छ। समाजका सदस्य तथा पत्रकार बम थापा सूर्यवंशी मगरको सल्लाह र प्रस्तावमा यस वर्ष नियमित पार्टी नगरी सदस्य तथा परिवारजनलाई प्राकृतिक वातावरणमा एकैसाथ घुमघाम, खानपान र मनोरञ्जन गराउने उद्देश्यले डर्डल डोर भ्रमण आयोजना गरिएको हो।

गत ११ जुलाई २०२५ मा आयोजित वार्षिक भेटघाट तथा भ्रमण कार्यक्रमको संयोजन बम थापा सूर्यवंशी मगरले गरेका थिए। कार्यक्रमलाई सफल बनाउन समाजका अध्यक्ष शिव थापा, उपाध्यक्ष दिल राना लगायत समाजका सदस्यहरूले सक्रिय सहयोग गरेका थिए। खानपान तथा विभिन्न परिकारको बन्दोबस्त र समन्वयमा लक्ष्मी आलेले महत्वपूर्ण भूमिका निर्वाह गरेकी थिइन्। बिहान साढे ८ बजे हेजबाट यात्रा भ्रमणका लागि समाजले बसको व्यवस्था गरेको थियो। सहभागीहरू बिहान ८ः३० बजे हेजबाट डर्डल डोरतर्फ प्रस्थान गरेका थिए। लामो यात्राका क्रममा बीच बाटोमा केही समय विश्राम गरिएको थियो। तर बस यात्रा आफैंमा कार्यक्रमको एउटा विशेष आकर्षण बन्यो।

सहभागीहरू नेपाली लोकभाका, गीत र दोहोरीमा रमाउँदै गन्तव्यतर्फ अघि बढेका थिए। मादलको तालमा गुञ्जिएका नेपाली लोकभाका र दोहोरीले बसभित्रको वातावरण उल्लासमय बनेको थियो। तिल थापा र नर थापाले मादल बजाएर यात्रालाई थप संगीतमय बनाएका थिए। सहभागीहरूले पालैपालो गीत र दोहोरी गाउँदा करिब तीन घण्टाको यात्रा रमाइलोमै बितेको थियो। बेलायतको व्यस्त जीवनमा आ–आफ्नो काम र जिम्मेवारीमा रहेका समाजका सदस्यहरू एकै ठाउँमा भेला भएर नेपाली लोकभाकामा रमाउँदा बसभित्रै गाउँघरको मेला र उत्सवको झल्को देखिन्थ्यो।

एउटै ठाउँमा २२ परिकार, बाँडीचुँडी खाने नेपाली संस्कार डर्डल डोर पुगेपछि बसबाट ओर्लिएका सहभागीहरूले आ–आफ्नो घरबाट तयार गरी ल्याएका खानाका परिकार एउटै ठाउँमा जम्मा गरेका थिए। त्यहाँ साना–ठूला गरी २२ प्रकारका विभिन्न खानाका परिकार राखिएका थिए। सबै सहभागीले ती परिकार आपसमा बाँडीचुँडी खाएका थिए। विभिन्न नेपाली स्वाद र परिकारले पिकनिकस्थललाई नै खुला आकाशमुनिको भोजस्थलमा परिणत गरेको थियो।

सहभागीहरूले रमाइलो गर्दै परिकारहरूको स्वाद लिएका थिए। खानाको विविधता, स्वाद र व्यवस्थापन देखेर कतिपय सहभागीले ती परिकार कुनै स्तरीय तथा पाँचतारे होटलमा पाइने खानाभन्दा कम नभएको प्रतिक्रिया दिएका थिए। खानपानको समन्वयमा लक्ष्मी आलेले विशेष भूमिका निर्वाह गरेकी थिइन्। त्यस्तै, विभिन्न परिकार तयार गरी ल्याउने समाजका सदस्य तथा परिवारजनको योगदानले सामूहिक भोजनलाई थप विशेष बनाएको थियो। डर्डल डोरमा फोटो, घुमघाम र समुद्री किनारको आनन्द सामूहिक भोजनपछि सहभागीहरू डर्डल डोरको समुद्री किनारतर्फ लागेका थिए। डर्डल डोर प्राकृतिक चुनढुंगाको प्रसिद्ध समुद्री आर्च हो र डोर्सेटको जुरासिक कोस्ट क्षेत्रमा अवस्थित छ।

समुद्रको नीलो पानी र विशाल प्राकृतिक चट्टानी द्वारलाई पृष्ठभूमिमा राखेर सहभागीहरूले व्यक्तिगत, पारिवारिक र सामूहिक तस्बिर खिचेका थिए। कोही समुद्री किनारमा रमाए, कोही प्राकृतिक दृश्य नियाल्न व्यस्त भए भने अधिकांश सहभागी डर्डल डोरका विभिन्न स्थानमा फोटो खिच्दै र एकअर्काका तस्वीर क्यामेरामा कैद गर्दै देखिन्थे। सदस्यहरूले हाँसो, ठट्टा र आत्मीय कुराकानीका बीच समुद्री किनारको भरपूर आनन्द लिएका थिए। समाजका अग्रजदेखि परिवारका सदस्यसम्मको सहभागिताले भ्रमणलाई पारिवारिक र आत्मीय बनाएको थियो।

उकालोपछि फेरि खाजाको रमाइलो डर्डल डोरमा घुमघाम र फोटो सेसन सकेपछि सहभागीहरू पुनः माथि उक्लिएका थिए। दिनभरको घुमघामपछि सबैजना फेरि एकै ठाउँमा जम्मा भएर खाजा तथा बाँकी विभिन्न परिकारको स्वाद लिएका थिए। समुद्री किनारको यात्रापछि गरिएको सामूहिक खाजाले थकान मेटाउनुका साथै आपसी भेटघाट र कुराकानीका लागि अर्को अवसर दिएको थियो।

सहभागीहरूले खानाका परिकारको प्रशंसा गर्दै समाजका सदस्यहरूले घरघरबाट माया र मेहनतका साथ तयार गरी ल्याएको भोजन नै कार्यक्रमको एउटा महत्वपूर्ण विशेषता बनेको बताएका थिए।

फर्कने तीन घण्टाको यात्रा पनि लोकदोहोरीमय दिनभरको भ्रमण, खानपान र मनोरञ्जनपछि सहभागीहरू साँझ ५ः३० बजे बसमार्फत हेजतर्फ फर्किएका थिए। डर्डल डोरबाट फर्कंदा पनि बसभित्रको रमाइलो रोकिएन। बरु फर्कने यात्रामा नेपाली लोकभाका र दोहोरी अझ जमेको थियो। मादलको तालसँगै सहभागीहरूले पालैपालो लोकगीत तथा दोहोरी गाएका थिए।

गीतको सवालमा अर्को पक्षबाट जवाफ फर्किने, बीचबीचमा हाँसो र ताली गुञ्जिने तथा सहभागीहरू गीतको लयमा रमाउने क्रम यात्राभर जारी रह्यो। करिब तीन घण्टाको बस यात्रा नेपाली लोकभाका, दोहोरी र मादलको तालमा यति रमाइलोसँग बित्यो कि लामो यात्राको थकानसमेत अनुभव नभएको सहभागीहरूले बताएका थिए।

१६–१७ वर्षको यात्रामा फरक प्रयास हेज सेरोफेरो समाज यूकेले विगत करिब १६–१७ वर्षदेखि वार्षिक भेटघाट तथा विभिन्न सामाजिक गतिविधि गर्दै आएको समाजका सदस्यहरूले बताएका छन्। यसअघि वार्षिक भेटघाट प्रायः पार्टीका रूपमा आयोजना हुँदै आएकोमा यस वर्ष पहिलोपटक आउटडोर भ्रमण तथा पिकनिकको अवधारणा अघि सारिएको हो।

कार्यक्रमका संयोजक बम थापा सूर्यवंशी मगरले हरेक वर्ष एउटै शैलीमा पार्टी गर्नुभन्दा यसपटक केही फरक र स्मरणीय कार्यक्रम गर्ने सोचबाट डर्डल डोर भ्रमणको प्रस्ताव गरिएको बताए। उनले भने, “हामी हरेक वर्ष गेट टुगेदर गरेर पार्टी गर्दै आएका थियौं।

यसपटक पार्टी मात्र नगरी सबै परिवार एकैसाथ बसमा यात्रा गरौं, प्राकृतिक ठाउँ घुमौं, नेपाली खाना बाँडीचुँडी खाऔं र आफ्नै लोकभाका तथा दोहोरीमा रमाऔं भन्ने सोचले डर्डल डोर जाने प्रस्ताव राखेको थिएँ। सबैको साथ र सहयोगले कार्यक्रम निकै रमाइलो र स्मरणीय बन्यो।”

उनले कार्यक्रमको सफलतामा समाजका अध्यक्ष शिव थापा, उपाध्यक्ष दिल राना, खानपान व्यवस्थापनमा भूमिका निर्वाह गर्ने लक्ष्मी आले, मादलवादक तिल थापा र नर थापा तथा सहभागी सम्पूर्ण सदस्य र परिवारजनको सामूहिक योगदान रहेको बताए। “यो कुनै एक व्यक्तिको कार्यक्रम थिएन। सबैले आ–आफ्नो ठाउँबाट जिम्मेवारी लिएर सहयोग गर्नुभयो।

कसैले खाना तयार गर्नुभयो, कसैले व्यवस्थापनमा सहयोग गर्नुभयो, कसैले गीत र दोहोरीबाट रमाइलो थप्नुभयो। यही सामूहिक भावना नै हेज सेरोफेरो समाजको सुन्दर पक्ष हो,” सूर्यवंशी मगरले भने।

समाजका अध्यक्ष शिव थापाले पनि कार्यक्रमको व्यवस्थापन र सफल आयोजनाका लागि आयोजक तथा सहभागीहरूप्रति धन्यवाद व्यक्त गरेका थिए। उनले बेलायतको व्यस्त जीवनका बाबजुद समाजका सदस्यहरूको सक्रिय सहभागिता, सहयोग र आपसी आत्मीयताले कार्यक्रम सफल भएको धारणा राखेका थिए।

यसपटक विभिन्न कारण र व्यस्तताका कारण सहभागी हुन नसकेका समाजका सदस्यहरूलाई आगामी कार्यक्रममा सहभागी हुन आयोजकले आग्रह गरेका छन्। पार्टीको परम्परागत घेराबाट बाहिर निस्किएर गरिएको डर्डल डोर भ्रमणले हेज सेरोफेरो समाज यूकेको वार्षिक भेटघाटलाई यसपटक घुमघाम, सामूहिक भोजन, नेपाली लोकभाका, दोहोरी र पारिवारिक आत्मीयताको स्मरणीय संगम बनाएको छ।