लखन थापा मगर मेमोरियल गल्फमा १३८ खेलाडी र २२ टिम भिड्दै
लन्डन। मगर संघ यूकेको आयोजनामा नेपालका प्रथम सहिद लखन थापा मगरको स्मृतिमा हुन लागेको लखन थापा मगर मेमोरियल गल्फ टुर्नामेन्ट २०२६ मा १३८ व्यक्तिगत खेलाडी तथा २२ टिमले प्रतिस्पर्धा गर्ने भएका छन्।
प्रतियोगिता १५ अगस्ट २०२६, शनिबार मेडेनहेडस्थित बर्ड हिल्स गल्फ सेन्टरमा आयोजना हुनेछ। आयोजकका अनुसार प्रतियोगिताका लागि खेलाडी दर्ता बन्द भइसकेको छ।
नेपालका प्रथम सहिद लखन थापा मगरको योगदान र बलिदानलाई स्मरण गर्नुका साथै बेलायतभर रहेका नेपाली गल्फ खेलाडीबीच मित्रता, एकता र खेलकुद भावना प्रवर्द्धन गर्ने उद्देश्यले प्रतियोगिता आयोजना गरिएको मगर संघ यूकेले जनाएको छ।
अध्यक्ष लालु पुन भन्छन्—‘प्रतियोगिताले सहिदको सम्मानसँगै समुदायलाई जोड्नेछ’
मगर संघ यूकेका अध्यक्ष लालु पुनले नेपालका प्रथम सहिद लखन थापा मगरको योगदान र बलिदानलाई नयाँ पुस्तासम्म पुर्याउनु प्रतियोगिताको प्रमुख उद्देश्य रहेको बताए।
उनले भने, “नेपालका प्रथम सहिद लखन थापा मगरको स्मृतिमा यति ठूलो प्रतियोगिता आयोजना गर्न पाउनु मगर संघ यूकेका लागि गौरवको विषय हो। यो केवल गल्फ प्रतियोगिता नभई सहिदप्रतिको सम्मान, नेपाली समुदायबीचको एकता र बेलायतभर रहेका खेलाडीबीच मित्रता अभिवृद्धि गर्ने अभियान पनि हो।”
अध्यक्ष पुनका अनुसार प्रतियोगितामा १३८ खेलाडी र २२ टिमको सहभागिता सुनिश्चित हुनुले बेलायतको नेपाली समुदायमा गल्फप्रतिको बढ्दो आकर्षण र प्रतियोगिताप्रतिको विश्वास देखाएको छ।
“प्रतियोगितालाई निष्पक्ष, व्यवस्थित र स्मरणीय बनाउन हामी सम्पूर्ण तयारी गरिरहेका छौँ। सहयोग गर्ने प्रायोजक, स्वयंसेवक, खेलाडी, कलाकार तथा शुभेच्छुक सबैप्रति मगर संघ यूकेका तर्फबाट हार्दिक आभार व्यक्त गर्दछु,” उनले भने।
उनले बेलायतस्थित नेपाली समुदायलाई प्रतियोगिता तथा त्यसपछि आयोजना हुने पुरस्कार वितरण एवं सांस्कृतिक कार्यक्रममा सहभागी भएर खेलाडीलाई प्रोत्साहन गर्नसमेत आग्रह गरे।
विजेता टिमलाई शिल्डसहित ५०० पाउन्ड
प्रतियोगिताको टिम विधामा प्रत्येक टिममा पाँच खेलाडी सम्मिलित हुनेछन्। तीमध्ये उत्कृष्ट चार खेलाडीको स्कोरका आधारमा विजेता टिम चयन गरिनेछ।
विजेता टिमले प्रतिष्ठित लखन थापा मगर शिल्डसहित ५०० पाउन्ड नगद पुरस्कार प्राप्त गर्नेछ। उक्त शिल्ड तथा पुरस्कार प्रतियोगिताको मुख्य आयोजक मगर संघ यूकेले प्रायोजन गरेको हो।
प्रत्येक टिममा ह्यान्डिक्याप ०–६ भएका दुई, ७–१२ भएका दुई तथा १३–१८ भएका एक खेलाडी समावेश गर्नुपर्ने व्यवस्था छ। खेलाडीले व्यक्तिगत र टिम दुवै विधामा प्रतिस्पर्धा गर्न पाउनेछन्।
ग्रस विजेतालाई ट्रफीसहित ३०० पाउन्ड
ग्रस विधाका विजेताले ट्रफीसहित ३०० पाउन्ड नगद पुरस्कार प्राप्त गर्नेछन्। ग्रस रनरअपलाई २०० पाउन्ड प्रदान गरिनेछ।
ग्रस विजेताको ट्रफी तथा पुरस्कार अवकाशप्राप्त क्याप्टेन टम ढेगाले व्यक्तिगत रूपमा प्रायोजन गरेका हुन्। उनी प्रतियोगिताका ओआईसीसमेत हुन्।
ढेगाले लन्डन काठमाडौं न्युजलाई उपलब्ध गराएको पछिल्लो जानकारीअनुसार ग्रस विजेता र रनरअपका लागि क्रमशः ३०० र २०० पाउन्ड पुरस्कार निर्धारण गरिएको हो।
क्याप्टेन टम ढेगा भन्छन्—‘निष्पक्ष प्रतिस्पर्धा हाम्रो प्राथमिकता हो’
प्रतियोगिताका ओआईसी क्याप्टेन (अवकाशप्राप्त) टम ढेगाले प्रतियोगितालाई अनुशासित, निष्पक्ष र प्रतिस्पर्धात्मक रूपमा सञ्चालन गर्न आवश्यक तयारी गरिएको बताए।
उनले भने, “बेलायतभरका नेपाली गल्फ खेलाडीलाई एउटै मञ्चमा ल्याएर उच्चस्तरीय प्रतिस्पर्धा गराउनु हाम्रो उद्देश्य हो। नियमको समान पालना, सही ह्यान्डिक्याप र पारदर्शी नतिजालाई विशेष प्राथमिकता दिइनेछ।”
“नेपालका प्रथम सहिद लखन थापा मगरको नाममा स्थापित ट्रफीले प्रतियोगिताको प्रतिष्ठा र ऐतिहासिक महत्त्व दुवै बोकेको छ। ग्रस विजेताको ट्रफी तथा पुरस्कार प्रायोजन गर्न पाउनु मेरा लागि सम्मान र गौरवको विषय हो,” उनले भने।
ढेगाले सम्पूर्ण खेलाडीलाई खेलभावना, अनुशासन र आपसी सम्मान कायम गर्दै उत्कृष्ट प्रदर्शन गर्न शुभकामना दिएका छन्।
नेट विजेतालाई ट्रफीसहित २५० पाउन्ड
नेट विधाका विजेताले ट्रफीसहित २५० पाउन्ड नगद पुरस्कार प्राप्त गर्नेछन्। नेट रनरअपलाई १५० पाउन्ड प्रदान गरिनेछ।
नेट विजेताको ट्रफी तथा पुरस्कार A-Star Financial Solutions UK ले प्रायोजन गरेको हो।
कम्पनीका Mortgage & Protection Adviser रमेश सिंह सारङकोटी (CeMAP) ले लन्डन काठमाडौं न्युजसँगको टेलिफोन कुराकानीमा प्रतिष्ठित प्रतियोगितासँग सहकार्य गर्न पाएकोमा खुसी व्यक्त गरे।
उनले प्रतियोगिताको सफल आयोजनाका लागि मगर संघ यूकेलाई शुभकामना दिँदै सहभागी सम्पूर्ण खेलाडीको सफलताको कामना गरे।
तीन ह्यान्डिक्याप डिभिजनमा प्रतिस्पर्धा
खेलाडीको ह्यान्डिक्यापका आधारमा प्रतियोगितालाई डिभिजन ‘ए’, ‘बी’ र ‘सी’ गरी तीन समूहमा विभाजन गरिएको छ। प्रत्येक डिभिजनमा पहिलो र दोस्रो स्थान हासिल गर्ने खेलाडीलाई ट्रफीसहित नगद पुरस्कार प्रदान गरिने आयोजकले जनाएको छ।
प्रतियोगिता स्ट्रोक प्ले प्रणालीमा सञ्चालन हुनेछ। ह्यान्डिक्याप १९ देखि २४ सम्म भएका खेलाडीले भने स्टेबलफोर्ड प्रणालीमा प्रतिस्पर्धा गर्नेछन्। प्रतियोगितामा अधिकतम प्लेइङ ह्यान्डिक्याप २४ निर्धारण गरिएको छ।
टिममा सहभागी पाँच खेलाडीले आ–आफ्नो निर्धारित टी टाइममा व्यक्तिगत राउन्ड खेल्नेछन्। तीमध्ये उत्कृष्ट चार खेलाडीको स्कोर टिम च्याम्पियनसिपका लागि गणना गरिनेछ।
विभिन्न विधामा छुट्टाछुट्टै पुरस्कार
प्रतियोगितामा ‘लङ्गेस्ट ड्राइभ’ र ‘नियरेस्ट टु द पिन’ विधाका पुरस्कारसमेत राखिएका छन्। सिनियर तथा जुनियर विधामा पनि छुट्टाछुट्टै पुरस्कार प्रदान गरिनेछ।
व्यक्तिगत, टिम, ग्रस, नेट, विभिन्न ह्यान्डिक्याप डिभिजन, लङ्गेस्ट ड्राइभ, नियरेस्ट टु द पिन, सिनियर तथा जुनियर विधासहित प्रतियोगितालाई व्यापक र प्रतिस्पर्धात्मक बनाइएको आयोजकको भनाइ छ।
प्रत्यक्ष सांगीतिक तथा सांस्कृतिक प्रस्तुति
प्रतियोगितापछि आयोजना हुने कार्यक्रममा प्रत्यक्ष सांगीतिक तथा सांस्कृतिक प्रस्तुति पनि रहनेछ।
आयोजकबाट प्राप्त जानकारीअनुसार कार्यक्रममा Season 7 विजेता नीता मगर, मोडल डान्सर सरिस्मा मगर तथा अन्य कलाकारले प्रस्तुति दिनेछन्। खेलकुदसँगै आयोजना हुने मनोरञ्जनात्मक कार्यक्रमले सहभागी तथा अतिथिलाई थप आकर्षण प्रदान गर्ने अपेक्षा गरिएको छ।
बिहान ८ बजे पहिलो टी अफ
कार्यक्रमअनुसार खेलाडी बिहान साढे ६ बजेदेखि क्लब हाउसमा उपस्थित हुनेछन्। बिहान ७ बजे दर्ता तथा चिया–कफीको व्यवस्था हुनेछ।
बिहान पौने ८ बजे प्रतियोगितासम्बन्धी जानकारी प्रदान गर्नुका साथै सामूहिक तस्बिर खिचिनेछ। त्यसपछि बिहान ८ बजे पहिलो टी अफ सुरु हुनेछ।
प्रतियोगितापछि साँझ ७ बजे थामेल रेस्टुरेन्ट एन्ड बारमा पुरस्कार वितरण तथा रात्रिभोज आयोजना गरिनेछ।
मगर संघ यूकेले आयोजना गर्न लागेको प्रतियोगिताले नेपालका प्रथम सहिद लखन थापा मगरको स्मृतिलाई सम्मान गर्नुका साथै बेलायतको नेपाली समुदायमा खेलकुद, मित्रता, एकता र आपसी सद्भाव थप सुदृढ बनाउने विश्वास गरिएको छ।
भर्खरै
केम्पटन पार्कमा उर्लियो नेपाली संस्कृति, १७औँ नेपाली मेलामा पासा पुचः गुथिको वर्चस्व
लन्डन। बेलायतको केम्पटन पार्क रेसकोर्स आइतबार नेपाली कला, संस्कृति, भेषभूषा र मौलिक परम्पराले रंगिएको छ। तमु धीं एसोसिएसन यूकेद्वारा...
तपाइँको प्रतिक्रिया