समाजसेवाको प्रेरक जापानिज ओके बाजे

पाल्पा जिल्लाका बालबालिकाहरूका लागि ओके बाजे निकै प्रिय छन् । उनको वास्तविक नाम हो काजुमासा काकिमी । उनको नाम परिवर्तन हुनुमा भने रमाइलो घटना छ । सामाजिक काममा सक्रिय रहँदा नेपाली भाषा राम्रोसँग फर्काउन जान्दैनथे र ओके ओके भन्थे । ओके ओके भन्ने आदतलाई नै बालबालिकाहरूले टिपे र नाम नै ओके बाजे राखिदिए । उनी अहिले वास्तविक नामभन्दा ओके बाजेके नामले परिचित छन् ।

विगत २५ वर्षदेखि सामाजिक काममा सक्रिय भूमिका निर्वाह गर्दै आएका ७९ वर्षीय जापानिज नागरिक काजुमासा काकिमी अर्थात् ओके बाजेलाई तानसेनमा भव्य रूपले नागरिक अभिनन्दन गरिएको छ । वि. सं. २०५० सालदेखि पाल्पा जिल्लाको शिक्षा, स्वास्थ्य, आयआर्जन, खेलकुद, विकास निर्माण तथा जनचेतनाका क्षेत्रहरूमा ओके बाजेले निरन्तर रूपमा काम गर्दै आएका छन् । जिल्ला ग्रामीण क्षेत्रका बासिन्दाहरूलाई चेतनशील बनाउन शैक्षिक जागरणमार्फत् समाज रूपान्तरणको अभियानमा ओके बाजेको महत्पूर्ण भूमिका रहेको छ । पाल्पा जिल्लाका १५० विद्यालयलाई ओके बाजेले आफ्नो तर्फबाट सहयोग गरिसकेका छन् । यसरी जापानबाट नेपालमा आई तन, मन र धनले सामाजिक सेवाका कार्यमा सक्रिय भूमिका खेलेको भन्दै नेपाल सरकारले ओके बाजेलाई गोर्खा दक्षिणबाहू तेस्रोले सम्मान गर्दै नेपालका लागि आवासीय प्रवेश आज्ञा पनि प्रदान गरेको छ ।

ओके बाजे भन्छन्, ‘नेपाललाई गरिब देश भनेर भनिन्छ तर मलाई त्यस्तो लाग्दैन । देश गरिब भए पनि गरिब देशका मानिसहरूको मन धेरै धनी छ, त्यसैले मलाई पनि नेपाली हुन् मन लाग्यो ।’ सन् १९९३ मा पहिलोपटक नेपालको लुम्बिनी भ्रमणमा निस्केपछि उनलाई नेपालप्रतिको अमिट मोह जागेको हो । नेपालका प्राकृतिक सौन्दर्यहरूप्रति आकर्षित हुन् पुगेका ओके बाजेले नेपालीहरूको माया र स्नेहले नेपालमैै बस्ने योजना बनाए र नेपालमै बस्न थाले ।

विशेषतः पूर्वी पाल्पाका जनजाति मगर र दलित वस्तीहरूमा विद्यालय खोल्ने, स्वास्थ्य चौकीको निर्माण, गरिब बालबालिकाहरूलाई छात्रवृत्ति प्रदान, विद्यालयमा शिक्षक नियुक्ति, पुस्तकालय स्थापना र विद्यालय भवन निर्माणमा ओके बाजेले सहयोग गर्दै आएका छन् । ओके बाजेले जापानी पेन्सनबाट आउने सम्पूर्ण रकम जिल्लाको सामाजिक कार्यमा लगाउँदै आएका छन् । जापानको टोकियोमा रहेको आफ्नो घरसमेत विक्री गरी उनले पाल्पाको शिक्षा क्षेत्रमा खर्च गरेका छन् । एउटा असल समाजसेवी मात्र नभएर समाजसेवाको प्रेरक व्यक्ति पनि बनेका छन् काजुमासा काकिमी । समाज सेवा गर्छु भन्ने नेपालीहरूले ओके बाजेवाट धेरै सिक्नुपर्ने देखिन्छ ।