ओपन कन्सर्टमा युवायुवतीहरुको मुख्य आकर्षणकेन्द्र नायक धिरज मगर (फोटो फिचर सहित)

लण्डन । मगर संघ युकेले, बेलायतमा हरेक वर्ष आयोजना गर्ने नेपाली ओपन कन्सर्ट कार्यक्रम यस वर्ष पनि भव्य रुपमा सम्पन्न गरेको छ ।

ओपन कन्सर्टमा सदावहार गायक प्रेमध्वज प्रधान, गायक कुमार पुन, गायक कुलेन्द्र विक, गायिका शान्तिश्री परियार, कुमारी चेपाङ, सञ्जय गुरुङ, पवन राना, निखिता थापालगायतले विभिन्न गीत गाएका थिए । इन्तु मिन्तु लण्डन चलचित्रका नायक धिरज मगर, मगर गट ट्यालेन्ट २०१८ की विजेता सलिना थापालगायतले नृत्य प्रस्तुत गरेका थिए । नायक धिरज मगर ओपन कन्सर्टमा युवायुवतीहरुको मुख्य आकर्षणमा परेका थिए । नायक मगरसँग फोटो खिच्न ठूलो घुइचो लागेको थियो । यस ओपन कन्सर्टमा अर्को आकर्षणका केन्द्र बनेका थिए सदावहार गायक प्रेमध्वज प्रधान । प्रधानलाई नेपाली गीतसङ्गीतमा योगदान पुर्याएकोमा अभिनन्दन पनि गरिएको थियो । नेपाली राजदूत डा. दुर्गाबहादुर सुवेदी र मगर संघ युकेका अध्यक्ष सुनील रानामगरले गायक प्रधानलाई खादा र प्रशंसापत्र प्रदान गरेका थिए । कार्यक्रमको औपचारिक उद्घाटन हुनुपूर्व धौलागिरि नौमती बाजाका साथ अतिथिहरुलाई प्रवेशद्वारबाट मञ्चसम्म लगिएको थियो ।

कार्यक्रममा सचिव सरला रानाले हेल्थ एण्ड सेफ्टीका बारेमा जानकारी दिएकी थिइन् । महासचिव रुद्र थापाले सञ्चालन गरेको कार्यक्रममा अतिथिहरुले सामूहिक रुपमा उद्घाटन गरेका थिए । कार्यक्रम संयोजक सीता पुनले स्वागत मन्तव्य दिएको सो कार्यक्रममा प्रमुख अतिथि बेलायतका लागि नेपाली राजदूत डा. दूर्गाबहादुर सुवेदी, रसमोर बोरो काउन्सिलका मेयर काउन्सिलर सु कार्टर र अध्यक्ष सुनील रानाले मन्तव्य दिएका थिए । सांस्कृतिक कार्यक्रम सांस्कृतिक सचिव त्येन्याङ (सरु) राना, सूर्य गुरुङ, टेनिस राना, दिनेश रोकालगायतले सञ्चालन गरेका थिए । कार्यक्रममा राजदूत सुवेदी, गैरआवासीय नेपाली संघ अन्तर्राष्ट्रिय समन्वय समितिका उपाध्यक्ष कुल आचार्य एनआरएन युकेका अध्यक्ष योगकुमार फगामीलगायत नेपाली समुदायका प्रवुद्ध व्यक्तित्वहरु अतिथिका रुपमा उपस्थित थिए ।