नेपाली राजदूतावास लण्डनको आयोजनामा मनाइयो विश्व आदिवासी दिवस

लण्डन, शनिबार । नेपाली राजदूतावास लण्डनको आयोजनामा २५ औँ विश्व आदिवासी दिवस भव्य र सभ्य रुपमा सम्पन्न भएको छ । नेपाल भ्रमण वर्ष २०२० लाई लक्षित गरेर राजदूतावासमा पहिलोपल्ट मनाइएको यस कार्यक्रममा बेलायतमा बसोवास गर्ने विभिन्न जातका आदिवासी जातजातिहरुले आआफ्ना मौलिक पोशाकहरुमा सजिएर सो सांस्कृतिक कार्यक्रमलाई सफल बनाएका थिए ।

लण्डनस्थित दूतावासको प्राङ्गणमा आयोजना गरिएको फुड फेस्टिबलमा आदिवासी जनजातिअन्तर्गतका भेषभूषा, खानालगायतका विभिन्न सामग्रीहरु प्रर्दशित थिए । कार्यक्रममा विभिन्न जातजातिका झाँकी, सांस्कृतिक गीत र नृत्यहरु पनि प्रस्तुत गरिए । बेलायतका लागि नेपाली राजदूत दुर्गाबहादुर सुवेदीले बताए, ‘प्राकृतिक र सांस्कृतिक विविधताले भरिएको नेपाल अति सुन्दर छ । नेपालका हरेक संस्कृति मौलिक र जिवन्त छन् । आफ्ना छुट्टै संस्कृतिले धनी नेपाल निर्माण र समृद्धिमा आदिवासी जनजातिहरुको महत्वपूर्ण योगदान रहेको छ । यही कारण यो कार्यक्रम आयोजना गरिएको हो ।’

राजदूत सुवेदीले भने, ‘नेपालको आदीवासी जनजातिहरुको संस्कृति अत्यन्त धनी छ । वास्तवमा जनजातिहरुको संस्कार र संस्कृति नै नेपालका सम्पति हुन् । आदिवासी जनजातिहरुको कला र सङ्गीत नेपालका अभिन्न अङ्ग हुन् । उनीहरुले प्रयोग गर्दै आएका भाषा र भेषभूषा नेपाको राष्ट्रिय पहिचान हुन् । आदिवासी जनजातिहरुका खाना र परिकार अत्यन्त मौलिक छन् । त्यसैले विविधताभित्रको वास्तविक सुन्दरता आदिवासी जनजातिहरुको समृद्धि र झल्को दिन यस कार्यक्रमले थोरै भए पनि टेवा पुग्ने छ । नेपाल विविध जातजाति भएको देश हो र विविधताभित्र अनेकता छ । हामी सबै नेपालीका अनेकताभित्र कसिलो एकता पनि छ । यही वास्तविक र नेपाली मौलिक पहिचानकै कारण यस्तो कार्यक्रमले छुट्टै महत्व राख्छ ।’

कार्यक्रममा नेपाल आदिवासी जनजाति महासंघ बेलायतका वर्तमान अध्यक्ष र निवर्तमान अध्यक्षहरुलाई दूतावास लण्डनले खादा ओढाएर सम्मान गरेको थियो । सो कार्यक्रममा फिलिपिन्सका राजदूतलगायत थुप्रै पाहुनाहरुलाई निम्तो दिइएको थियो । उनीहरुलाई आदिवासी जनजातिहरुका खाना र प्रर्दशन गरिएका सामग्रीहरुको अवलोकन गराइएको थियो ।

कार्यक्रममा नेपालका ख्यातिप्राप्त गायक दीप श्रेष्ठलगायत अन्य गायक गायिकाहरुले आफ्ना प्रस्तुति दिइएका थिए र दर्शकहरुलाई मनोरञ्जन दिलाएका थिए ।