मदर अफ पाल्पा (युकेवासी पाल्पालीहरुकी आमा) को साथमा पाल्पाली वार्षिक कार्यक्रम सम्पन्न

फोटो फिचर सहित (Photo Credit: Allan Cook)
लण्डन । नेपालको अति नै सुन्दर नगरी पाल्पा जिल्लाबाट आएर बेलायतका विभिन्न भागमा बसोबास गर्ने पाल्पालीहरुको वार्षिकोत्सव तथा भेटघाट कार्यक्रम गत शनिबार लण्डनको फार्नबोरोमा सम्पन्न भएको छ । कार्यक्रममा संरक्षकहरु, सल्लाहकारहरु र डिग्री हासिल गरेका समाजका सदस्यहरुलाई सम्मान गरिएको थियो ।

बेलायतका लागि नेपाली राजदूत डा. दुर्गाबहादुर सुवेदी प्रमुख अतिथि र समाजका अध्यक्ष वाचस्पति रेग्मीले दीप प्रज्वलन गरी उद्घाटन गरेको कार्यक्रम संस्थाका महासचिव खुम कुँवरले सञ्चालन गरेका थिए । कार्यक्रमका संयोजक एवम् वरिष्ठ उपाध्यक्ष गोपाल थापाले स्वागत मन्तव्य राखेका थिए भने महिला उपाध्यक्ष लक्ष्मी आले र महिला समूहले पाहुनाहरुको स्वागतको व्यवस्था गरेका थिए ।

उत्सवको अवसरमा ८६ वर्षीया आमा भूमिसरा थापालाई ’मदर अफ द पाल्पाली समाज युके‘को उपाधिले सम्मान गरिएको थियो । उनलाई कार्यक्रमका मुख्य अतिथि बेलायतका लागि नेपाली राजदूत डा. दुर्गाबहादुर सुवेदी र संस्थाका अध्यक्ष वाचस्पति रेग्मीको बाहुलीबाट सर्टिफिकेट र खादाद्वारा सम्मान गरिएको हो ।

यस वार्षिक कार्यक्रमको दोस्रो चरणको सांस्कृतिक कार्यक्रम भने संस्थाका सचिव बुद्धि गाहाले सञ्चालन गरेका थिए । सो कार्यक्रममा स्थानीय कलाकार मोहन रानाको व्याण्डका कलाकारहरूले मनोरञ्जन दिएका थिए भने नेपालबाट आएका राष्ट्रिय कलाकारहरू जमुना राना, कुमार पुन, भूमिका शाह र पवन थापाको वेजोड लोकभाका र स्थानीय कलाकारहरूका नृत्य अत्यन्त मनोरन्जनात्मक भएको हुनाले सबै पाल्पालीहरू झुमेका थिए । अन्त्यमा समाजका अध्यक्ष वाचस्पति रेग्मीले समाजका गतिविधिमा सक्रियतापूर्वक सघाउने सबैलाई धन्यवाद दिएका थिए ।