मगरहरूको राष्ट्रिय चाड माघेसङ्क्रान्ति लण्डनमा मनाइने

बम थापा (सूर्यवंशी)

लण्डन । मगरहरूको महान् चाड माघे (मगर) सङ्क्रान्ति मगर संघ युके वेष्ट लण्डन शाखाले वर्षेनी मनाउँदै आएको छ । माघेसङ्क्रान्ति सबै शाखाहरूले एकै दिनमा मनाउँदै आएकै कारण अरु शाखातिर जान नमिलेको हुँदा यस साल अरु शाखाहरूले भन्दा अगाडि नै यस शाखाले ४ जनवरी २०२० को दिन मनाउने निधो गरेको हो । माघेसङ्क्रान्ति विशेष कार्यक्रमका लागि हालैमा गोर्खा नेपाली कमिटी बोरो अफ हन्सलोले संयोजन गरेको नयाँ हल हन्सलो फुटबल क्लबको हलमा मनाउने भएको छ । बेलायतमा बसोबास गर्नुहुने नेपालका चर्चित राष्ट्रिय लोकदोहारी कलाकार गायक मनसुधन थापामगर र बेलायतमा अति नै चर्चित गायिका कल्पना श्रीपाललाई सो कार्यक्रममा आमन्त्रित गरिएको संस्थाका उपाध्यक्ष गणेश रानाले जानकारी गराएका छन् ।

मगरहरूको महान् राष्ट्रिय पर्व माघे सङ्क्रान्तिको भेलाको अवसरमा विशिष्ट अतिथिहरूलाई आमन्त्रित गरिएको शाखाका सचिव लोक थापाले खबर गरेका छन् भने स्थानीय कलाकारहरूको मगर संस्कृति झल्काउने विशेष प्रस्तुति रहने, माघेसङ्क्रान्तिको अवसरमा मगरको विशेष परिकार र अन्य बन्दोबस्तसमेत पूरा भएको शाखाका अध्यक्ष टेकबहादुर रानाले बताएका छन् । यो भेलामा बाक्लो सहभागिता रहने वेस्ट लण्डनका मगर बुद्धिजिवीहरूको भनाइ रहेको छ ।