कार्यालयको सामान खरिदमा भ्रष्टाचार गरेको भन्दै तीन सशस्त्र प्रहरीलाई कैद र जरिवाना

सामान खरिदमा भ्रष्टाचार गरेको भन्दै विशेष अदालतले सशस्त्र प्रहरीका एसएसपी गोपाल मिश्र, इन्सपेक्टर चित्रबहादुर केसी र हवल्दार नयनबहादुर ओलीलाई जरिवाना र कैद सजाय सुनाएको छ।

विशेष अदालतका अध्यक्ष न्यायाधीश बाबुराम रेग्मी, सदस्य न्यायाधीशहरू रत्नबहादुर बागचन्द र चण्डीराज ढकालको इजलासले बिहीबार उक्त फैसला सुनाएको हो।

उनीहरूले बाँकेस्थित सशस्त्र प्रहरी बल नौबस्तामा कार्यरत हुँदा ठेकेदार राजु रावलसँग मिलेर भ्रष्टाचार गरेको विशेष अदालतको ठहर छ। रावल जेजे ट्रेडिङ एन्ड इन्टरप्राइजेजका सञ्चालक हुन्।

इजलासले तीनै जनालाई छुट्टाछुट्टै बिगो जरिवाना र कैद तोकेको छ। उनीहरूले फर्जी कागजात खडा गरी बिल पेस गरेको अख्तियारको अभियोगपत्रमा उल्लेख थियो।

विशेषका प्रवक्ता पुष्पराज पाण्डेका अनुसार एसएसपी मिश्र र इन्सपेक्टर केसीले ६३ लाख १६ हजार रूपैयाँ भ्रष्टाचार गरेको ठहर छ। बिगो र जरिवानाबापत उनीहरूले जनही ६३ लाख १६ हजार बुझाउनुपर्ने छ। कैद पनि एक-एक वर्ष तोकिएको छ।

एसएसपी मिश्रले उच्च ओहोदा दुरूपयोग गरेर भ्रष्टाचार गरेको भन्दै थप ३१ लाख ५८ हजार ४ सय जरिवाना र ६ महिना कैद भुक्तान गर्नुपर्ने विशेषको फैसला छ।

यी दुवै प्रहरी अधिकारी र ठेकेदारले बिगो, जरिवानाबाहेक राज्यलाई थप जनही ४२ लाख ११ हजार भराउनुपर्ने फैसलामा उल्लेख छ। एसएसपी मिश्रबाट राज्यलाई भराउने रकम जोड्दा १ करोड ३८ लाख ८५ हजार हुन आउँछ। इन्सपेक्टर केसीलाई थप जरिवाना र कैद गरिएको छैन। उनले जम्माजम्मी १ करोड ३ लाख तिर्नुपर्ने हुन्छ।

त्यस्तै, ठेकेदार राजु रावलले १ करोड २६ लाख ३३ हजार बिगो र ४२ लाख ११ हजार जरिवाना गरी जम्मा १ करोड ६८ लाख राज्यलाई भर्नुपर्ने फैसला विशेषले सुनाएको छ। उनलाई कैद सजाय गरिएको छैन।

हवलदार नयनबहादुर ओलीलाई ३१ लाख ५८ हजार ४ सय ४१ रूपैयाँ र ६ महिना कैद सुनाएको छ।